Bal ma iswaydiisay?
Maxaa qof aad maalin uun kula qurux badnaan jiray ugu dambayn kuugu noqdaa qof aad la yaabto inaad la hadli jirtay? Qof hadalkiisu qalbigaaga dejin jiray, joogitaankiisuna maalintaada iftiin u noqon jiray, codkiisana aad maqalkiisa u xiisi jirtay. Qofkii aad saacadaha la qaadan jirtay adigoon ka daalin, maanta wuxuu noqday qof aad xusuustiisa la yaabto Noloshu mararka qaar waxay ina tusaysaa in dadka aysan is beddelin hal maalin gudaheed, balse dareenka iyo xiriirka ayaa si tartiib ah isu beddela. Wixii shalay kuu ahaa farxad iyo raynrayn, maanta waxay noqon karaan xusuus keliya. Hadalladii kuu muuqan jiray kuwo gaar ah waxay noqdaan erayo caadi ah, codkii qalbigaaga gilgili jirayna wuxuu isu beddelaa cod aan waxba kugu reebin Waxaa laga yaabaa inuusan qofkaasi is beddelin, balse waxaad adigu ka kortay dareenkii aad u haysay. Ama waxaa laga yaabaa in waayuhu idin kala geeyeen ilaa aad noqoteen laba qof oo aan is aqoon sidii hore Ugu dambayn, waxa ugu yaabka badan ma aha in qofku kaa tago, ee waa sida uu qof qalbigaaga dunida ka buuxin jiray ugu dambayn ugu noqdo qof aad la yaabto inaad maalin uun la sheekaysan jirtay. Xusuustaas ayaana mararka qaar ka xanuun badan kala tagga laftiisa.
0 Comments